Лявон Вольскі — бадай што галоўны музыка ў гісторыі беларускага рок-н-рола. Уплыў гэтага чалавека на беларускую культуру вызначаць нашчадкі, а ў сучаснікаў яго творчасць выклікае захапленне.

Ён належыць да невялікага кола людзей, якія паклалі жыццё на адбудову і дабудову храму беларускай культуры. Ён высокаталенавіта браўся за розныя жанры і падвіды року і лягчэйшай музыкі і ніводнага разу не адышоў ад прынцыпаў спеваў па-беларуску.

Творчасць Лявона пераканала цэлыя пакаленні, што можна быць нонканфармістам і пры гэтым пісаць па-беларуску, што рок-музыка магчымая па-беларуску, што беларускае — гэта сучасна, прыгожа і па-еўрапейску.